男子組合Boy'Z、劉思惠（Maggie）同董敏莉（Money）等噚日喺旺角新開嘅「雞仔嘜」舖頭行Catwalk，雞仔嘜呢個經典牌子一向都係賣內衣褲，一心諗住啲歌手點都會着番一、兩件內衣，點知呢個咁重要嘅任務就交咗畀其他Model，其中一個男模重着住條激凸底褲四圍走，Boy'Z就只係着孖煙囪。
事後，佢兩個做訪問重話一共着咗三條底褲，問到佢哋為乜着咁多底褲，二人即刻扮晒怕醜，𠵱𠵱哦哦，又話人哋要求佢哋着，之後有人篤爆問佢哋係咪怕何B仔現形，Kenny先尷尷尬尬話：「係囉！」Steven就笑住咁話：「有啲嘢唔使講得咁白嘅。」
而Maggie同Money都話唔敢望嗰位激凸男模，怕人哋誤會，搞到大家都尷尬，Maggie重話：「我都唔敢着住底褲行Catwalk，好似重激過着泳衣。
歌神許冠傑（阿Sam）已經決定咗喺八月四日至十三日再加開十場「繼續微笑會歌神」演唱會，近日嚟阿Sam都係忙於綵排演唱會，而周慧敏亦答應會擔任第一場演唱會嘅嘉賓。不過，佢兩個𠵱家重考慮緊喺《心裡日記》、《印象》同《親親我面》三首歌入面揀一首合唱，歌迷聽到佢哋會喺舞台合作都開心到暈啦，唱乜嘢歌都冇乜所謂啦。
容祖兒（Joey）噚日去新城接受訪問，講起佢早前拍新歌《夢露》時差啲走光件事，佢個助手重爆佢當時只係識得笑，Joey話：「當日着件開胸衫，啲Dancers要喺兩邊拉我向後退，點知就拉開埋件衫，當時笑只係笑個導演個樣，其他人重睇到呆晒。之後拍完一個鏡頭就貼膠紙一次，搞到個身有疤痕，𠵱家變咗刀疤兒。」
《我們不會忘記》梅艷芳演唱會VCD噚日首次推出，而各大唱片店，好似HMV都將阿梅演唱會VCD擺喺當眼位置。旺角多間唱片店重整日喺度播放阿梅嘅演唱會片段，有間重話半日就賣咗一半貨㖭！據知，初印有二萬隻，由於反應熱烈，所以會再加印。其實等咗咁耐，總算可以睇番阿梅嘅最後演唱會，歌迷重唔搶住買咩！
李嘉欣噚日喺台灣宣傳電視劇《畫魂》，佢聲稱𠵱家係單身，否認同內地傳媒大亨覃輝嘅訂婚傳聞，佢重用國語話：「我們只是見過一次面，他應該沒有我的電話，我也看不到我們未來發展的可能性。」經常被傳給富商照顧，李嘉欣話：「我就是富商，不需要被富商包養，富商大多給人愛計算的感覺，我目前正努力發掘對象，有消息再告訴大家。」
