呢排樓市新聞日日都係話減價，搞到好多啱啱入市嘅買家十五十六，再見到政府推出「租者置其屋計劃」，即係賣公屋，惟有忍痛撻定。中原助理營業董事許偉邦話，新界北區呢兩日就共有五宗撻定個案，預計陸續有嚟。
許偉邦講，呢班撻定嘅買家，喺早一個禮拜入市，重未簽正式買賣合約，見勢色唔對，諗諗吓決定撻定，好似粉嶺中心L座低層六室，成交價百四萬，買家撻定，損失五萬元。而上水旭埔苑D座高層六室，自由市場成交價一百萬，買家撻定及賠定，共損失三萬。
由於市況偏淡，市場上嘅放盤量大增，兩日多一成，至千一個，業主叫價調低三至五巴仙，埋枱重有得再減，實際減幅可達一成。
澳門金沙賭場開業，過萬人爭相過江「搏殺」，場面震撼。記得兩年前九月，九龍倉以美國拉斯維加斯賭場做包裝概念嘅深井碧堤半島，開賣場面一樣墟冚，淡市中首晚內購賣出幾百伙。
中原地產噚日同發展商搞優惠促銷，雖然九倉下半年至開賣第二期，但地產代理就昅到實，做定銷售預備工夫。中原噚日重送咗副巨型無敵「同花順」啤牌，畀九倉助理董事黃光耀，寓意呢個樓盤全行「通殺」，無人能及。
噚日利嘉閣開舖，到賀嘅新地代理執行董事雷霆話，馬灣珀麗灣喺中環二號碼頭嘅頭等候船室今日開幕，但怕人太多太迫，所以今日都唔會去視察。佢重提醒記者，呢個周末冇乜嘢都唔好去嗰度附近，驚住爭睇珀麗灣嘅人流會塞路。
雷霆重話，下個禮拜嘅高潮，就係星期四開葵芳新都會廣場嘅展銷廳，到時會有模型同現場實景睇。而噚日珀麗灣開始派認購表，一日就派咗五千份。
近期一同二手樓都掀起減價風，部份業主見狀趁勢出貨，先行套利，但也有人趁低吸納，真係有人辭官歸故里，有人漏夜趕科場。
香港置業麥雄堅講，尖沙嘴擎天半島一座極高層F室，原業主舊年十一月用五百九十八萬買入，諗住用嚟長線投資，但見樓市回軟，趁𠵱家重有錢賺，於是出售，放盤十日就以八百萬賣出，賺二百零二萬。單位一千四百四十方呎，呎價五千五百五十五蚊。
聽講接手嘅係區內投資者，認為美國將加息對樓市只係有短暫影響，覺得單位價錢好筍，所以入貨。
蘭西
電郵地址：
