本欄五月五日《通識教育三鞠躬》，真正意思係講當今學生讀書少，不如到殯儀館睇吓，明白「音容宛在」嘅文意。估唔到一位自稱「老朽」嘅讀者徐來函云：「現今學子知識水平低下，豈非近十年政府推行通識教育之禍？想我國大教育家孔老夫子最痛恨終生學習、通識教育。《禮記》云：『時過而後學，則勤苦而難成；雜施而不孫（遜），則壞亂而不修。』香港政府卻倒行逆施，提倡持續進修，令港人身受學者不得息之慘……不但出身中大的老朽身受其害，於港大主修電腦之友人亦
被迫修讀Accounting、Marketing，令人苦於其中之餘，主修科亦被累，在主修、通識兩面戰下，陷入GPA低落之窘境
……順帶一提，老朽乃近年畢業之奸商學院產品
……」
老朽徐都算幽默，但你反對通識教育，左丁山不敢苟同，讀大學如果只識修讀主科，眼光視野未免太狹窄，成世做technician嘅機會好大。美國大學就要求大學生必修文、理、社、數、藝術（戲劇、音樂等）各一科，讀芝加哥大學頭兩年主要就係讀通識。老朽徐嘅校友、大賓架彭玉榮剛喺星期一獲頒中文大學榮譽院士，彭兄主修經濟學，畢業後就入東亞銀行，從見習主任（trainee）做起，三十一年後之今天，係東亞銀行執行董事兼副行政總裁，係鄉村俱樂部會長（排隊等入會嘅，要等幾十年）、香港銀行家會所主席，唔好話唔巴閉，你估彭兄今日最懷念嘅係讀邊科呢？聽日話畀你聽。