金管局行政總裁任志剛星期日上港台《與CEO對話》節目。主持人問佢有乜優點同缺點，佢話優點等人講，缺點自己就最清楚，就係做人太執着，怕人蠢；佢話改緊，因為佢開始接受人哋唔係佢個field，好難明佢啲嘢。
任總年薪八百萬，算唔算快樂人呢？佢就話唔算好快樂，好多時都因呢樣嗰樣瞓唔着，好似有時應該做嘅嘢，因為外在因素唔敢冒險，所以唔開心。
任總又話佢最喜歡嘅對聯，係有次去大陸旅行時睇到，上聯係「發上等願結中等緣享下等福」，下聯係「擇高處立就平處坐向寬處行」。大意係做人要有目標，作君子之交，滿足於現狀，同時要高瞻遠矚。而叫任總推介一本好書，佢首推二月河嘅《雍正皇朝》，話本書教識佢做人要低調，叻都唔好俾人知，否則結局會好慘。真係過來人嘅體會呢。
傳真︰2623-9278
電郵︰