曾經幫特區政府研究點樣加強社會凝聚力嘅中大教授關信基一向慎言，佢老兄噚日竟然喺商台爆咗一句，話佢開始懷疑有一個有組織、有計劃嘅戰略部署，對付唔聽話嘅傳媒，對香港新聞自由好不利。大教授此語一出，八方即時叮一聲諗通咗，唔怪得由今年初起，不斷有人提醒八方醒定啲，中央已鎖定目標，實行逐個擊破。
冇法啦，中聯辦錯報軍情，港澳辦收錯料，但係責任就賴晒兩支咪一報一刊，好似抬舉咗啲，你話如果唔係老董搞到民怨沸騰，邊個叫到五十萬人上街，一百萬人投票咁叻？
至於阿飛封商台咪，當然係「計劃」之外，因為冇人估到山東大漢忽然咁勇，其後又忽然咁驚青，八方聽聞，鄭大班私下都笑佢，做十三日就頂唔住，大班做咗二千日，朋友一樣咁多，你話佢係咪俾阿飛激死。
不過，知情人就叫大家應該多啲同情飛哥，因為佢做《風波裡的茶杯》，分分鐘驚動到曾慶紅副主席，派朱育誠落嚟要搵阿飛傾偈，又就算阿飛推得甩今次唔見，政協副主席兼統戰部部長劉延東下星期會親自來港出席佛指舍利供奉大典，到時點避？
中聯辦十九號，即係阿飛喺大氣電波公開話唔做嗰日，通知所有港區全國人大同政協，以及省級政協常委、中華海外聯誼會嘅理事及名譽理事，下周三佛誕下晝三點半至五點，喺君悅大禮堂會面兼聽佢阿姐演講，你話阿飛係咪避冇可避，只好劈炮唔撈。
（圖）李鵬飛喺商台開咪十三日就唔撈，俾大班笑。
資料圖片
傳真︰2623-9278
電郵︰