女子網球壇曾幾何時係「黑珍珠」威廉絲姊妹嘅天下，不過佢哋兩姊妹各有各忙，唔怪得女網球𠵱家由比利時雙姝軒寧同史施達絲稱霸啦！大、細威忙啲乜？家姐威廉絲就忙於邊打波邊做設計師，而個妹莎蓮娜就忙拍拖囉！
邊個咁好彩俾莎蓮娜睇上？咪電影導演畢特韋拿（BrettRatner），佢曾執導電影《沉默的赤龍》同埋《火拼時速》等。喺日前莎連娜重同畢特韋拿一齊亮相康城影展，鬼咁煙韌。
雖然唔少網友話二十二歲嘅莎蓮娜以黑人嚟講，都算靚女，而且又身家豐厚，冇理由睇上大佢十一年兼肥肥矮矮嘅畢特韋拿？不過，係人都知莎蓮娜成日話想做明星，重話唔排除掛拍後做全職女明星，加上佢之前嘅「好朋友」係七十三歲嘅荷李活製片羅拔伊雲斯（RobertEvans），相信大家都明莎蓮娜嘅選男友品味啦！
佩魯賈下個月要同意乙第六名踢升降附加賽，所以當其他球隊放緊假，佢哋重日日操練。佩魯賈由舊年七月開操備戰圖圖盃，到踢完下個月二十日附加賽次回合，過足個馬拉松球季。其他球隊睇見佩魯賈職球員苦況，以後一定計清楚條數至諗靠唔靠走後門進軍歐洲，話唔定會趕客喎。
保頓有意邀AC米蘭中場列當度過檔，據講成事機會幾高。保頓以前招攬過氣名將或者失意軍人嘅紀錄唔錯，好似佐卡夫同埋甘普，話唔定列當度都有發展機會。講時講，維拉日前落實用三百萬鎊買入馬田拿臣，似乎AC啲棄將都真係幾搶手。
中超聯只進行過一周賽事就已經有教練請辭，執教上海申花嘅韋健遜就以家人有病為理由，唔再續長約離隊返英國。其實，上星期因家人健康問題返英，最後都趕唔切喺揭幕戰督師嘅韋健遜，季前曾經同球會高層鬧翻，導致不和，無得續長約究竟係家人問題，定係內有案情？
姚明前日啱啱由上海飛到北京，撞正米高佐敦訪京之行。但係由於姚明已經由Nike跳槽到Reebok，同波神已經各為其主，由戰友變成為敵人，所以今次兩人都緣慳一面。否則Nike肯定好似上次卡達訪京咁，安排一場「飛人Vs巨人」秀，商場就係咁現實架喇！