今年嘅康城影展，似乎好多人賞識風格獨特嘅韓國片，但係香港人始終鍾情於韓國嘅瘋狂愛情喜劇。最近我羅拉八到有套由文根英同金來元合作嘅《MyLittleBride》喺韓國本土跑出，兩位主角啱啱俾電影網頁選為「最合襯情侶」之外，重會緊接《野蠻師姐》打到嚟香港㖭！
唔單止咁，呢位《藍色生死戀》入面嘅小恩熙文根英，重被視為下個月舉行嘅韓國大鐘獎「最有人氣女星獎」嘅頂頭大熱，佢喺網上投票入面，目前以三倍票數遙遙領先第二位嘅金荷娜。查實呢個結果令人驚訝嘅地方，係英妹單憑呢套《My》片突然爬過唔少知名女星嘅頭。而片中男主角靚仔金來元就冇咁好彩，始終敵唔過權相祐同張東健呢啲風頭躉。
《My》片上咗一個月，一直留守票房五甲內，喜劇嚟講算威啦！英妹喺戲入面係個高中生，元哥就係個鹹濕嘅加拿大留學生，但佢哋唔知自己出世時已同對方有婚約。佢哋知道後梗係死都唔肯結婚啦，於是英妹爺爺想出以患上絕症嚟要脅佢哋……啲橋段老套到唔想提，但年紀相差好遠嘅兩位主角，今次真係擦出火花，其中一場床上戲同力抗賊仔嗰場戲，更得到影評大讚。