港股兩日升約500點後，投資者轉為觀望阿扁就職演詞及兩岸局勢，大市借勢回吐，收11339，跌129點，成交141.6億元。
阿虎一位關心大中華局勢嘅朋友講，以往兩岸關係就算差，都只係玩吓軍演就算，最終都係有驚無險，但最近中央高調干預香港事務，放棄以香港作為一國兩制的示範樣辦後，實在令人擔心北京會對台採取更強硬手段。若兩岸爆發戰爭，香港所受衝擊，肯定比「911」及沙士厲害幾倍。
中電信（728）認購反應不俗，據聞獲超購兩倍，由原定配售的51億股，加碼至58.5億股。點知噚日股價不但冇追回周三近400點的升幅，重要跟住大市下跌，連配股價2.30元亦一度失守，最後雖險守此關收市，但仍跌3.2%。中電信剛配完股，市況就回軟，承配人心情當然十五十六，如果淡友再出些少力質破中電信配股價，可能會有唔少人要沽貨止蝕。
安海斯完成收購哈啤（249）29%股權。換言之，國資委已批准呢單相當敏感嘅國有資產摸貨交易，令到國內唔少財經界人士大跌眼鏡，而哈啤股權爭奪亦變得更加刺激，因為安海斯與SABMiller在哈啤的持股量旗鼓相當，花落誰家好視乎兩者出價高低，因此哈啤股價勁升6.3%至5.05元，再創新高。
天地數碼（500）復牌首日冇乜表現，噚日一度下跌14.4%至1.84元，不過午後有大盤接貨，最後收2.175元，倒升1.2%，成交4966萬元。阿虎聽到坊間有人唱好隻股，話要見4元，不過阿虎就唔係好信。
阿虎