今日係我咁大個仔最緊張一日，因為可以見到我偶像佐敦。晨早七點半去到東方新天地，已經有幾十個民工排隊；最神奇係一班佐敦展搞手同NikeChina高層都喺度，但奈何要趕去記者會，無時間去問。
由於要有媒體證先入得，所以保安唔算嚴，全場大概三四百個記者左右。好好彩企到攝影區第一排，等咗半個鐘，終於近距離見到佐敦；佢身型肥咗，但仍然好型，近距離望佢令我手都震埋。期間知道佢再一次聲東擊西，一早就去咗東方新天地睇展覽，原定下午兩點嘅到訪則取消，終於知點解今朝咁多Nike高層喺度。記者會主要係JordanBrand總裁米拿解說佐敦牌的過去現在將來；到問答時間，大陸記者問咗好多「唔到肉」問題，MJ亦用返好「行」的答案回應，嘥晒！
之後折返展覽會，依然唔准入場，激死！現場有唔少「神迷」唔肯走；好似其中一個迷咗佐敦成十年的屈小姐，專程用咗兩日由新疆坐火車落北京等見波神；點知搞咗兩日影都未見過，講講吓重喊埋出嚟，真係令人心酸！
問過其中一個見到MJ嘅搞手，話飛人只握手不簽名，而展出嘅除佐敦牌外，尚有melo1.5和七代鞋辦，不過其餘有份參展的收藏家展品唔算齊，驚喜不大，令我對上年HK-Kicks搞嘅鞋展更自豪！
今晚會飛返香港，聽日佐敦「香港自由行」，一齊去朝拜喇！
文：Hleung