古天樂最近因為拍電影《柔道龍虎榜》，每日收工後還要去學柔道，他表示學柔道最重要是學會拍蓆卸力，而在苦練了一段時間後，自己已練到黑帶境界。
古天樂日前接受雜誌《WFD國際服裝動態》訪問時透露，最近忙於演出《柔道龍虎榜》，每日開工均要應付不少動作場面，另外又要一邊拍戲，一邊跟教練學柔道，古仔在苦練了一段時間後，表示自己已練到黑帶境界，不過他所謂的黑帶還未正式考牌，所以不可作準。
古仔笑言：「一般人學柔道，導師會要求他先將基本功學好，至少要花半年時間，然後先至學防守同進攻，而芸芸基本功中，最重要是學會點樣拍蓆卸力，如果學得唔好，好容易會受傷同癱，我自己一樣有學基本功，我就係學識咗拍蓆先至開始學黑帶功夫嘅，我逐招逐招咁記，但都係唔識得活學活用，要學黑帶唔難，但係易學難精。」
古仔表示以前曾看過日本片《柔道龍虎榜》，他說：「真正嘅柔道，同電視睇到嘅係兩回事，真正柔道比賽時，唔會一招一招咁擺甫士，係要隨機應變，以最快嘅速度將對方撻落地下。」
古仔又表示對於運動興趣不大，但最喜歡的是潛水，他說：「因為要做嘢，加上生活圈子比較窄，所以我幾乎冇乜運動嘅機會，尤其係籃球、足球，更加冇機會接觸，我最鍾意係潛水，因為覺得水底嘅世界比較寧靜。」
問古仔是否因為水底沒有人，因為不用煩所以喜歡潛水，他即時反應很大地說：「呢個係你講㗎，同我冇關。」