恒指前日急升近400點之後，昨日最低見11235，最多跌過233點，埋單只係唔見129點，調整三分一。炒輪策略，係見低買Call輪。
賭大市上番，直接做法係買恒指Call輪，對象係9799，收6.7仙，跌11%，9月到期，溢價7.7%，槓桿率27.3倍。隻輪溢價唔低，但相對於其他同類輪，已經算係有吸引力嗰隻。
九倉（004）進銳退速，前日升1.80元，昨日回落70仙，再跌嘅話，可以諗吓兜啲Call輪，對象係9086，收35.5仙，散10%。隻輪11月到期，溢價4.8%，槓桿率5.7倍，數據算唔錯，當然波幅唔會好似其他高溢價高槓桿率窩輪咁勁。
太A（019）再爬高90仙，走勢靚，不過冇隻Call輪買得落手。睇好太A嘅話，只有直接買入正股。
中信泰富（267）前日急彈1.50元，昨日回番20仙，收17.30元，若見繼續調整，見番16.50元左右，可以諗吓Call輪9139。隻輪收29.5仙，跌3%，10月到期，溢價6%，槓桿率5.9倍。
滙控（005）與恒生（011）齊齊跌，若見反覆回軟，不妨小敲相關Call輪。
滙控Call輪揀9640，9月到期，輪價23.4仙，溢價6.7%，槓桿率47倍，呢件波幅好勁，贏輸都大啲。恒生Call輪揀9748，9月到期，輪價35.5仙，溢價6.3%，槓桿率26.9倍。
章盛