港股升二跌一，暫時可視為小調整，只要唔補番前日個上升裂口（11133至11227），咁再上就有機會向250日線（11714）推進。
噚日恒指曾創出今次反彈新高（11495），但中段回得好急，最低落到11235，大跌233點，尾段升番上11339收市，跌129點；期指跌幅較大，低水43點。今次恒指由10918反彈，升上10日線（11395）水平爭持，有形成小型頭肩底之勢，若升破11500而又有大成交支持，量度上升目標指向12000，呢個無疑係最樂觀嘅短期預測，因為向上有250日線（11737），真係阻力重重，但可能性不能抹煞。
國企跟大市調整，急升之後，回一回，好正常，但個別仍有強勢表現。早兩日外資大行「撻」着咗個反彈浪後，噚日見到中資買盤接力，而且買得重勇，主力指向兗煤（1171）同江西銅（358），另外，重鋼（1053）、馬鋼（323）、安徽海螺（914）同鎮海煉化（1128）亦一路密密收集。大市調整後再上，呢一批股票會行得好快。
中國宏觀調控開始見效，5、6月份嘅數字，應該可以畀到人有較大信心，中國經濟可以軟着陸，而中國短期內亦唔會加息，若經濟持續降溫，則國企嘅調整好大機會已完成，早輪「過度拋售」嘅低位，例如重鋼的2.525元、兗煤的5.2元、江銅的2.05元，同埋鎮化嘅4.45元等，應冇機會再見。
中國人民銀行行長周小川表明短期內唔會加息，條件係消費者物價指數（CPI）唔可以超過5%，今年4月，CPI升到3.8%，係7年以來嘅高位。中國暫時唔加息，對股市同商品市場都係好消息，但情況亦唔可以太樂觀，因為去年第2季係沙士期，相比之下今年5及6月嘅數字，超過5%的機會唔細。
至於美息，又有新變數，格林斯潘坐多聯儲局主席個位4年，市場揣測原本有9成機會在6月底開始的加息周期，可能會延遲，甚至拖到總統大選之後。不過，息口上升係大趨勢，早加比遲加重好。市場預計美息喺呢個周期會上升2至2.5厘，港息唔會跟足，最多只係加厘半到兩厘，存息重未係好吸引，相信大部份資金仍會留在股市和樓市，翻風作浪。
郭兆誠