容祖兒（Joey）昨日到卡拉OK慶祝三首K歌被點播達一百萬次，下月中生日的Joey，同時又要參加成龍盃，由於Joey曾於成龍盃撞車扭傷頸，故她這次也深怕會出意外。
容祖兒昨日到尖沙嘴Neway卡拉OK出席活動，慶祝她的全新大碟衝破白金銷量，以及三首K歌連續在熱唱榜三星期，總共點播次數達一百萬次，而英皇高層吳雨亦專誠到場支持，除讚她是救市奇葩外，還表示加Joey人工，令她十分高興。
Joey說：「話係救市奇葩就唔敢當，呢隻碟係我攞獎後第一次出嘅廣東碟，歌迷會有要求，所以特別緊張，好彩都冇令人失望。」
而Joey下月底會到上海參加成龍盃，由於Joey在一九九九年參加成龍盃時曾發生意外弄傷頸令她留下陰影，所以Joey參賽會以安全為主，勢要奪得「最慢車速獎」。
Joey說：「上次我啱啱攞咗車牌就去，點知就搞到架車衝埋欄度，我就好驚架車會爆炸，我條命好矜貴，所以今次我會揸得慢啲，平時我都揸得好似纜車咁慢，我係六月十六日生日，希望到時可以過二十四歲多幾日嘞。」當Joey講到不吉利說話時，即被身邊工作人員喝止。
此外，Joey早前為卡拉OK拍攝宣傳片段，在片段內化身有型俠女，要翻觔斗及耍功夫，過程相當辛苦，所以Joey十分佩服Twins在《千機變》中的身手。
採訪：駱華齡 攝影：陳烱威
