基金愛股福田實業（420），日前公布截至2004年2月底中期業績，盈利比去年同期下跌31.85%至1.35億元。本來小初以為福田股價應該會受到打擊，點知情況剛好相反，福田股價守得相當穩陣，確係令小初大感意外。
換轉係前一排，一眾基金工業股業績稍為唔掂，股價即刻插水，跌幅重分分鐘以兩成計。經紀黃話，估計係公司同投資者夠溝通，關係亦搞得好。原來好多證券行一早就估到福田盈利倒退，加上公司前景要向前睇，棉價已有回落之象，芬佬認為福田已經度過最壞的時間，所以並無沽售之意。
除咗口講之外，芬佬重身體力行，在市場密密吸納，尤其係連呢排睇淡港股嘅大摩，持股量亦有10%咁多，既然係咁，福田股價當然企得住。
查實福田舊年因為棉價高企，股價已經牛皮好耐，在公布業績前，股價一度跌至全年低位4.675元，公布業績後又遇上港股大反彈，令股價重上5元水平，就算噚日大市回落，股價仍然企在5元，微跌唔夠1%。
慕容小初