雖然話近排個樓市「𣲷」咗，但係豪宅嘅交投仍然唔錯。就快入伙嘅何文田君頤峰，發展商喺現樓整咗示範單位，同埋開放會所畀公眾參觀，市場消息話，噚日影帝劉青雲同埋老婆郭藹明，下晝時段去咗睇樓，不過就好低調，兩人參觀過二十六樓示範單位，大約逗留二十幾分鐘就離開。至於，有冇睇啱心水單位，佢哋回答係暫時未有計劃搬離西貢區。
講開呢個樓盤，唔少知名人士先後入市，好似醫管局行政總裁何兆煒，美容界女強人鄭明明、藝人鄭少秋等。
除此之外，聽聞長實高級營業經理郭子威，噚日帶同集團喺北京負責東方廣場嘅同事，前往參觀君頤峰，觀摩吓行家嘅豪宅。
由超過五百間中小型代理行，組成嘅地產代理聯會，就舊區二手住宅買賣所做嘅統計顯示，上個月成交量比舊年同期勁跌超過四成，都好驚人。
據新一屆主席郭德亮講，聯會已作出多項措施，希望能提高番啲成交量。首先係同金融界人士成立嘅利信通按揭服務公司簽訂協議，為客戶提供好啲嘅按揭條件。重有係成立中央託盤系統，每個會員每周最多有五個樓盤，可以喺網上免費宣傳；聯會會透過電腦，將資料發放畀各會員。
另外，因為舊區重建同維修，有助增加二手成交同價值，所以聯會表態，支持政府呢兩方面嘅做法。
馬灣珀麗灣又有新搞作，喺中環二號碼頭花咗五百萬整個頭等候船室，新地代理執行董事雷霆話，可以媲美航空公司嘅頭等候機室。裏面有自助小食，有電視雜誌睇，重可以上網，住客等船嘅時間都唔慌會悶親。
為求逼真，發展商重整埋類似登機證，畀記者扮入閘，重請咗幾位空姐打扮嘅小姐招呼。
候船室擺咗個珀麗灣模型，雷霆話，聽日就會開放畀貴賓參觀，而島上面嘅示範單位，就要六月底先至有得睇。至於二重天單位，𠵱家收到四、五十名客人出價。
用招標方式出售物業，好處係吸引到各方買家注意，但有時遇啱市場氣氛轉弱，即使係短期現象，對反應都會有一定影響。唔知係咪呢排市場大吹淡風，早前搵中原招標嘅一籃子五項尖沙嘴商廈物業，業主決定將截標日期由下個禮拜二，延長至六月二十五號。
聽中原商業部助理營業董事陳玉雲講，其中港晶中心六樓三個單位，已經成功以每呎三千五賣咗，面積共六千九百零一方呎，即係二千四百幾萬。
香港發展商不時都會搞搞新意思，例如恒基地產就試過喺旗下屋苑搞狗展，唔知係咪「好橋」唔怕抄呢？番禺祈福新邨都諗住喺六月辦狗展，等愛狗一族可以獲得最新飼養狗隻嘅知識，例如訓練方法、狗食品、同狗美容等訊息。
呢個全國首屆狗展，祈福業主只要畀十蚊人民幣就可以入場，非業主就二十皮，扣除成本後，收益將會捐畀廣州紅十字會。
蘭西
電郵地址：
