馮仁昭四圍超：
台舞台劇團長無端數臭阿B

鍾鎮濤（阿B）上年年初喺台灣做舞台劇《愛情有什麼道理》，做咗台北幾場之後，本來準備喺高雄加場，但因為對方遲遲度唔到期，再加上沙士時去台灣要隔離，到對方畀到期，阿B已經接咗其他嘢做，結果搞咗唔少是非出嚟。

阿B斥博宣傳
之前劇團嘅老闆已經決定唔會告阿B，但係劇團嘅團長郎祖筠，噚日喺台灣開新戲《媽在江湖》嘅現場，就同記者講話佢考慮緊可能會告阿B。
郎祖筠話自己唔識章小蕙，但𠵱家開始同情佢，因為見識咗阿B同范姜嘅嘴臉，佢話章小蕙負債再多至少冇宣布破產，但係破咗產嘅阿B就錦衣玉食，佢話劇團嘅執行長早前行街，見到阿B同范姜去咗郭化南路一間舖頭買衫，一買就買咗成十幾萬台幣。
馮仁昭噚日同阿B求證呢件事，佢都冇咁好氣話：「唔該有人要做宣傳就唔好借我過橋，如果有人生安白造一啲冇發生過嘅事，我唔排除會採取法律行動。」
馮仁昭亦覺得雖然阿B破咗產，但范姜依然有碌卡買衫嘅自由啫。

溫碧霞生兒育女唔怕遲
溫碧霞噚日以性感打扮到清水灣拍攝亞視節目《開心大發現》，但身穿短裙嘅佢竟然唔小心春光乍現。對於有指溫碧霞計劃生育，溫碧霞自己就解釋話：「身邊啲朋友重緊張過我，但呢啲隨緣啦，唔會刻意製造，亦都冇話設唔設防，幾多歲生BB𠵱家都冇所謂啦。」

任達華做旅遊大使威過成龍
任達華前晚去咗一個有關電視機嘅活動，大會送咗部五十吋嘅電視畀佢，佢話屋企𠵱家已經有六部電視，認真誇張。活動上重設有一個迷你攝影展，係展出任達華今年年頭喺非洲影嘅傑作。
任達華重好開心咁話獲委任為中國旅遊大使。咦？咁咪威過香港旅遊大使成龍？而佢就好得戚咁話：「係囉！香港旅遊協會真係唔識貨。」

Steven十五歲追中學Miss
男子組合Boy'Z前晚接受商台訪問，講到讀書時嘅趣事，Steven同Kenny兩個嘅話題自然落喺追女仔身上。Steven喺節目度重大爆自己喺讀書時嘅豔遇，原來喺佢十五歲時已經好鍾意梁詠琪（原名梁碧芝），又因為咁就鍾意咗一個叫梁碧芝嘅老師，雖然佢講到大家都有意思，但最後都無疾而終。