港進聯立法會議員許長青，較早前生腎癌，上咗廣州醫病，最後割去一個腎。外界就傳聞大病初愈嘅青哥，有感生死無常，突然睇化，覺得九月競選連任冇機，要將進出口界議席拱手讓畀民建聯黃定光。
港進聯主席劉漢銓噚日喺立法會同八方講，青哥喺廣州睇完呢啲報道好扯火，佢話康復得好好，九月連任絕對冇問題！
劉主席前日上咗廣州南方醫院探青哥。青哥講佢知，二月發現自己無端端暴瘦，初時重以為食得多抗膽固醇藥，但四月上廣州check過，先至晴天霹靂發現竟然生腎癌，不過廣州醫學都算發達，有一隻新技術叫生物化療，做完個療程都唔會甩頭髮。
青哥身體冇事，相信劉主席最可以暫時鬆一口氣，保番住港進聯一個位。
港進聯立法會四個席位，只有青哥最有把握成功連任，自從青哥傳出患癌，八方聽聞好多左佬同土共都想趁病攞命，乘機攝位，吼住進出口界議席，話之你愛國愛港，一於將港進聯踢出立法會，剝佢光豬。
傳真︰2623-9278
電郵︰