最近喺香港搵唔到劉千石，佢班老友又神神秘秘，係人都估到佢梗係又返廣州睇阿媽，因為要探阿媽，一盡孝道，搞到要好似做賊咁，喺呢個世界只有一個國家會咁，就係中國，香港只有一兩個人咁樣被迫，就係阿石同長毛。
果然不出所料，阿石阿媽九十七歲高齡，做仔嘅想見佢，就第一時間向特首辦懇求，話要回鄉探母。結果批得嚟，都趕唔切母親節回鄉，阿石就同立法會同事先去南韓訪問，上周三返港，周四就上廣州。
千辛萬苦去開廣州，阿石索性叫多飛，重睇埋醫生，執埋藥。一返嚟就聽到飛哥封咪嘅消息，覺得好驚奇，因為早兩個星期佢同對方傾偈，飛哥重猛話自己好enjoy開咪；𠵱家又話寫咗信畀吳邦國，又話唔做人大，阿石點都諗唔到會變成咁。梗係啦，飛哥身為港區人大，飲祖國奶水，單打祖國，即是不孝，下次話唔定輪到飛哥冇回鄉證，阿石就做人大代表都唔奇。
傳真︰2623-9278
電郵︰