西九龍文娛藝術區項目又辣着火，因為地產建設商會再度發炮，批評項目交畀「單一財團」發展，但政府話明寧願收番，都唔會拆細畀不同發展商競投。一向唔多出聲嘅鷹君副主席羅嘉瑞，講起呢單嘢都忍唔住加把口反董。
Dr.Lo同八方講，董政府衰咗兩樣：第一係唔應該賤賣土地；第二係唔應該搵地產項目做補貼，「好似科學園咁，起咗寫字樓丟空晒，唔使本丫嘛，唔同我哋起寫字樓，有血有汗。」佢重話，地產建設商會已經嗌到好大聲，不過阿董又例牌收唔到。八方同佢講，長實、新地都係地產商會成員，佢哋好似唔係咁睇法噃，Dr.Lo苦笑：「有人要送個大包畀你，你話唔要，重係商人嚟？」
講開大商家，物流發展局主辦嘅物流國際會議，噚日原本請咗胡應湘主講，但佢臨時放飛機，原來哥頓突然上咗北京。呢個爆炸時刻，哥頓突然北上，一係就港珠澳大橋重有篤背脊空間，一係就關乎第三屆特首，中方好睇胡爵士台戲嘞。
（圖）今次到羅嘉瑞（右）因為西九單嘢大罵政府犯錯。
傳真︰2623-9278
電郵︰