因「保利集團」在香港買「國寶級文物」，醒起掌相名師之言，思索何謂真正國寶，星期六睇報紙，香港唯一一個去過戰地採訪嘅女記者張翠容喺佢嘅專欄（經濟日報五月十五日）講日本人質的故事，甚有感慨。張小姐話，伊拉克綁架日本人，在日本引起風波，人質獲得釋放之後，返到日本，俾日本政府責罵，話佢哋愚蠢無知，無端端跑去伊拉克闖禍，帶嚟麻煩。一位女人質受到各方責難，頂唔順，離開東京，返回家鄉北海道靜養，一位男記者人質就俾老闆炒魷。
日本政府嘅行為，極為東方式。東方嘅家長好唔鍾意仔女唔聽話，去冒險，出咗事就要父母出頭。父母愛子女，一定出頭營救嘅，但安全回家之後，父母一定狠狠教訓子女一頓，下令唔准再犯，子女惟有頭耷耷，輪到自己做父母之時，又係咁樣教自己嘅仔女，如此循環不息。
張翠容講到美國國務卿鮑威爾對日本人質嘅反應。鮑威爾話，日本人質懷有人類理想，甘願為理想冒險，一個國家要擁有肯為理想而冒險嘅人民，國家先至會有進步，人類前途才會更美好！張翠容認為呢番說話令人感動。
西方與東方，真係有一道文化鴻溝，難以逾越。美國人認同冒險、讚賞冒險，態度與東方人完全唔同。各位老友，如果你身為父母，請撫心自問，你係東方式還是美國式？計我話，真正嘅國寶係一種肯冒險與創新嘅心態，唔係靜止不動嘅千年古物。