成狂躁症雜誌封面人物　咦？
Britney柏林演唱忽然喊住走

美國女歌手BritneySpears，最近喺歐洲舉行巡迴演唱會時，負面新聞無日無之，佢喺演唱會上面經常咪嘴不在話下，佢同男友嘅私生活亦成為焦點。日前Britney喺德國柏林開騷嗰陣，居然唱到收尾嗰陣粒聲唔出，重喊住咁衝咗落台，大家睇到𢱑晒頭。
據講大前晚Britney喺演唱會末段，突然眼濕濕，當時首歌都未播完，Britney就即刻飛奔出去上咗佢喺場館門外嘅平治跑車度，趕返酒店。當時大約有二十位fans喺酒店門外等Britney簽名，不過Britney一於好少理。有fans重話Britney喺車上不停咁喊，喊到連個妝都溶晒，成隻熊貓咁。

趕返屋企拍拖
佢身邊有人話，Britney最近因為太投入拍拖而唔想做嘢，成日扭計想早啲做完巡迴演唱返屋企，搞到有啲抑鬱，所以大前日做做吓演唱會嗰陣突然嚟料。Britney嘅屋企人𠵱家都好擔心Britney嘅身體狀況，不過佢前晚喺法國里昂開騷時，心情睇嚟都已經好番好多！
雖然係咁，不過Britney仍然人氣沸騰，呢排佢又登上瀏覽器Lycos最多人搜尋嘅人物第四位。不過英國有本專門研究狂躁症同精神分裂症嘅醫學雜誌，搵Britney做封面人物，睇嚟佢瘋狂嘅形象，都幾根深柢固。