政壇教父鍾士元噚日以科大副校監身份，頒發「大學學會會士」榮銜畀對科大有貢獻嘅前立法局同立法會議員鄭明訓及陸恭蕙。俾記者問到對學生李鵬飛封咪時，佢話「係咩？聽佢講啦你哋」，大蛇點都唔肯講心嗰句，原因就係「我已經封咗咪（嘴）成幾年啦」。
大蛇八十幾歲，同記者對答仍然一副政壇教父口脗，問佢對𠵱家政治氣氛點睇，佢話「冇批評，你唔好問，我講唔出」；覺唔覺得有白色恐怖？「唔關我事㗎，我已經退休」。最後一句「你哋問唔到，點樣問都冇用㗎」，成功打退記者。陸恭蕙都話𠵱家嘅政治氣候，係四十年來最差，「喺政壇想講自己嘅話，會有好大限制。」
（圖）鄭明訓（右二）將「大學學會會士」榮譽獻畀兩年前過世嘅母親，令校長朱經武（左）、大蛇（左二）、陸恭蕙（中）同校董會主席陳祖澤（右）都好感動。
馬泉崇攝
傳真︰2623-9278
電郵︰