李鵬飛封咪，連政府內部都嚇咗一跳，話估唔到國家換咗管香港事務嘅新班子加大力度掃場，打壓言論自由真係有料到。出到英文中國日報嚟點名，亦即追剿陳水扁嘅級數，重做落去有乜嘢後果？精叻如飛哥一定明白。
據消息人士稱，中方最火滾嘅就係飛哥領正「港區人大」橡皮印章，次次上北京免費招待，食佢嘅，着佢嘅，本來叫佢凡事睇面色舉手講yes，點知飛哥唔生性，竟然將人大本來名義上嘅「監督政府」職責，當做真嘅嚟玩，呢一樣真係好傷國家嘅心。
飛哥封咪，有高人教佢，事到如今，你keep住個所謂港區人大嘅生銹汽水蓋都冇用，因為人人都會以為你屈從壓力，想𠱁番胡溫一笑，但大陸佬出名記仇，一定執行家法，分分鐘召你上去開會，搣蓋事小，當佢係叛國咁扣留審訊就事大，倒不如當怕咗佢，呢件嘢唔敢要咯，雙手奉還，留畀佢下次封畀維園阿伯好過。飛哥聽咗，諗吓覺得有道理，於是學孫悟空，毅然唔撈「避馬瘟」，費事大材小用同佢養畜牲，一於返花果山做番隻有人格尊嚴嘅馬騮王。飛哥，恭喜你。
傳真︰2623-9278
電郵︰