短短一個月，香港言論自由慘遭連環三擊！繼大班毓民受迫害封咪，經祖國官方傳媒點名謾罵，又輪到港區人大代表飛哥宣布下野，封咪商台，重憤而掟番件「人大代表」黃馬褂畀中方。
飛哥受到邊方面恐嚇，現時係選舉前敏感時期，對方係要佢血流五步定家破人亡，以飛哥佢跟開高佬麥起，凡三十年行走政治江湖嘅經驗，就梗係唔會明講，惟有講一啲充滿人情味、聽落又十分之反智嘅理由來遮掩。飛哥嘅痛苦，全港市民相信都心中有數！
因為八方喺一兩日前，先至私晤飛哥，飛哥當時紅光滿面，後生咗十年，佢話好享受做緊呢個節目。佢當時重話冇晒朋友唔緊要，幾十年一早睇到化，大可順便推辭晒啲應酬飯局，早睡早起更加健康！八方就鼓勵佢話：接咗呢個波射門，對得住大班有餘，而且，去咁多飯局做乜？國畫大師楊善深，若然唔係近年香港咁多大陸高官嘅應酬飯局，魚翅燒鵝五糧液，累積咁多膽固醇，又點會心臟病突發？肯定重有十年命！
估唔到，飛哥「哈哈哈」嘅山東型笑聲未落，即時宣告封咪，重話唔想得失好多朋友，例如胡應湘、羅康瑞、范太呀咁。
唔係呀哇飛哥？乜你咪以前輩身份提點過八方：香港地（起碼喺中環），出嚟行，係冇真朋友嘅咩？喺飛哥活躍嘅區域，東自山光道馬會、西至立法會大樓同香港會、南至香島小築、北至北京人民大會堂，邊個係朋友？有利益嘅，就三世有仇都係朋友；若然冇利益，兼中方點名批鬥，就結拜兄弟迎面行過都詐唔識運路走！
八方相信，喺二十年前，新華社社長許家屯都係胡應湘、羅康瑞嘅好朋友，𠵱家許家屯敗走美國，你估胡爵士同羅康瑞飛開去加州，會唔會打個電話畀老許出嚟聚吓舊？
飛哥封咪商台，各方反應，似乎最興奮嘅就係梁振英，佢話香港傳媒可以大報特報飛哥封咪嘅消息，證明香港真係有「新聞自由」！
反為鬍鬚孫嘅評論重有啲人性，佢叫飛哥若然受威嚇，記住要報警！正如民主教授蔡子強話齋：香港經已進入黑暗時代！飛哥有情有義，點都好，香港人多謝你接棒短暫地捍衞過言論自由。飛哥今日，經已唔係「人大代表」，投胎做個自由人，脫離餓鬼道，咁先至值得恭喜，飛哥，請保重，香港人將會以良心嘅選票答謝飛哥、毓民、大班言論福祿壽三星嘅貢獻！
傳真︰2623-9278
電郵︰