列斯降班後主將離隊消息開始浮現，前鋒阿倫史密夫就肯定要走，估計身價值一千萬鎊﹙約一億四千萬港元﹚，但係曼聯開價居然低手到得三百幾至五百幾萬鎊，真係㩒得就㩒。
阿倫史密夫一早就俾曼聯、利物浦等大球會吼實，甚至傳華倫西亞、國際米蘭都想搵呢位英格蘭國腳，所以列斯雖然想盡快放走，減少球員薪金支出；但係好似紅魔咁開三百五十萬鎊同埋五百五十萬鎊兩個價位，真係可能睇完羅賓遜過檔熱刺都係一百五十萬鎊後，擺明㩒人價，買個科倫番嚟做後備都七百幾萬鎊啦！
我求大俠覺得基維爾上季過紅軍都值五百萬鎊，阿倫史密夫價位應該咁上下，一千萬鎊就無可能，睇吓列斯夠唔夠定力，等到好買家！
唔講你唔知，羅賓遜喺禮拜一原來三喜臨門：正式由列斯轉會熱刺、入選英格蘭踢歐洲國家盃決賽周同埋結婚。但係，因為英格蘭隨即進行備戰，所以佢唔可以同佢老婆仔去度蜜月，就遲吓先至有得合皮。人哋話結婚嗰排通常好旺，唔知羅賓遜可唔可以過啲旺氣畀英格蘭呢？
今屆食白果嘅拜仁證實教練希斯菲特喺季尾離隊，個位由史特加教練馬加夫補上，但馬加夫到明年七月先上任。聽講馬加夫喺今季提早上任，咁肯定對史特加士氣打擊好大，分分鐘影響佢哋喺周六訪利華古遜嘅表現。拜仁就會對弗賴堡，班球員應會用勝利嚟送別希斯菲特。
侯活因對波圖時犯錯，搞到曼聯喺歐冠盃十六強出局，結果就俾領隊費格遜雪咗一輪。侯活日前就話，全靠老費雪一雪佢，佢先可以攞番個正選位，同埋有番咁醒神嘅表現。但係，明眼人都知老費覺得後備門將卡路爾唔掂，先至用番侯活；但難得侯活咁識擦鞋，睇嚟應該好襟撈。
韋斯咸前晚喺英甲升班附加賽淘汰葉士域治後，將會同水晶宮打決賽；由於兩隊都係嚟自倫敦，換言之呢場比賽就變成一場倫敦打吡戰，真有睇頭。我求大俠冇話特別鍾意邊一隊，但就知道韋斯咸啲番士多啲，而且佢哋喺英超嘅歷史亦比水晶宮豐富，所以一般都希望佢哋可升班。