一葉知秋，如果大家見過大班、毓民同飛哥點樣「收聲」之後，重信係個別事件、信言論自由冇變，咁就真係恭喜——好難得有咁樂觀嘅性格。八方唔係悲觀，只不過見聞多些少而已，近日變化，的確令人心寒。話說《蘋果》一向唔受祖國歡迎，以往內地政府請香港記者去國內採訪，甚少請《蘋果》，但佢哋喺香港搞活動，見到《蘋果》記者到場，都較為「寬容」，畀記者自由進出。不過隨住近期政治環境緊張氣氛升級，呢點點寬容都冇埋。
噚日喺灣仔會展舉行嘅○四年粵港經濟技術貿易合作交流會，特首同唐唐都有去，好盛大。事關中港兩地合作新聞，《蘋果》記者如以往一樣去採訪，不過今次主辦單位早有準備，接待處嘅小姐以「沒有邀請你們」為由，拒絕記者入場。遲吓，可能……所以八方好體會到商台嘅壓力，又難怪一個「風波」都容唔到。
傳真︰2623-9278
電郵︰