天地數碼（500）噚日復牌，真係令小初有啲失望，挾住摩托羅拉之名，原本估計點都有一番熱鬧，但股價最高只見過2.50元，收2.15元，冇起跌。
經紀陳話，天地數碼復牌認真着時，撞啱大市急升近400點，天地數碼成交金額接近1.2億元，估計有好多炒家都落場玩兩手，但可能有人趁機沽貨，所以股價平收。
不過，天地數碼阿媽友利控股（419）就勁得多，最高見過8仙，收7.2仙，大升63.6%。小初埋怨經紀陳唔及早提點，佢就解釋話天地數碼身價大升，友利股價自然水漲船高，但友利投機味較重，炒賣風險更大，所以唔敢推介。佢重話天地數碼噚日平收，友利幕後亦可能埋單計數，結論都係跟唔過。
另外，幾個月前曾經熱炒嘅銀建國際（171），早前股價隨大市回落，曾出現勁插。噚日隻股跟隨大市反彈，升13.3%，收1.45元。經紀黃話，之前買佢嘅芬佬，好多已斬頭離場，但聽講有班大陸捧場客力撐，唔想股價跌得咁肉酸。
慕容小初