港股由14000下調至11000水平，累積跌幅約3000點，噚日總算作出稍為似樣的反彈，回升近400點，收報11469，成交168.48億元。
電盈（008）證實可能出售固網資產，公司亦搞重組削股本以便派息，似乎小小超真係無心戀戰，想將電盈變成現金公司，大派股息後就全身而退。
其實，電盈董事會同管理層年年開股東會都俾小股東指住鬧，令到小小超冇晒face，與電盈分手係遲早嘅事。有傳聞話，電盈會入股網通以進入國內市場，不過大家最好等佢派大息就算啦，無謂過份憧憬。不過，電盈既已放聲氣話賣盤，唔排除會吸引其他投資者加入競投電盈固網，可能對股價有刺激作用。
噚日資金重新流入香港，令港元轉強，但可能與資金流入認購中電信（728）有關，聽講市場對批股反應唔錯。事實上，中電信早已被大舉沽空，噚日港股大挾淡倉，但隻股就停咗牌，淡友點都要認購平倉。據聞有人刻意唔畀貨淡友平倉，迫佢哋在市場掃貨。不過，中電信一見個市反彈就急急腳配股，擺明係對後市唔樂觀，淡友點會睇唔出呢一點。
天地數碼（500）以每股1元超低價，配股畀摩托羅拉，較前收市價2.15元大幅折讓53.48%。復牌後股價抽高至2.50元就有人出貨，結果天地數碼打回原形，收報2.15元，冇起跌。
不過，控股大股東友利控股（419）就勁升63.6%至7.2仙，成交1216萬元，絕對唔係乾升。e莉莎話，市場傳出友利可能會趁機沽售天地數碼，而主席高振順亦可能趁高沽埋友利。
阿虎