港股連續第2日反彈，噚日恒指上升近400點，升勢之急，出乎市場預期之外，而成交亦配合。滙恒除息，期指低水大幅收窄。
恒指高收11469，上番10日線（11462）水平，確認升破後，可向250日線（11704）推進，本月10日有一個下跌裂口（11835-11704），闊達131點，亦有機會補回。預期嘅反彈已出現，但大市跌夠未，重要睇反彈後再試多次底，先可確認。到目前為止，調整低位係本周一的10918，同14058的高位比較，跌幅22.3%，歷時兩個半月，跌幅已差不多，但時間未夠，5窮6絕7翻身，未來的個多月，估計恒指會在10500至11800間上落，建立底部，下半年再升過。
國企彈力十足，國指高收3936，升近7%。大行全面掃貨，其中仍係以兗煤（1171）、中鋁（2600）、鎮化（1128）同馬鋼（323）做主力；講升幅，前3隻由12%至18%不等。3隻鋼鐵股中，鞍鋼（347）升11.5%，馬鋼同重鋼（1053）都升9%，重鋼噚日嘅拜也以中資為主，國企股價跌得太殘，已經吸引各路英雄入市。
中國宏觀調控，房地產投資增長已放緩，樓價亦略為回軟，但只係過往出現過炒風嘅大城市，其他地區嘅樓價，表現仍算穩定，有大行最近曾「親歷其境」睇過，得出上述結論，重認為宏調層面只係在發展商（實力不足者退出市場），唔會影響到置業者的需求，未來供應減少，樓市發展會更為健康。大行指今次內地地產股大跌，正好為長線投資者提供最佳入市機會，考慮對象：中國海外（688）同遠東發展（035）。
遠展由高價2.075元回落，歷時3個月，跌到0.89元先喘定，大跌57%，噚日反彈到1.08元收市，去番250日線，1.11元係10日線同下降軌所在，一升破，以反彈前跌幅的0.382，最少可上番1.34元。
遠展3月結算，過往年度業績好快宣布，估計獲利1.7億元，每股盈利15.6仙。現年度係高收成期，家下保守計算，預測盈利由早前的5.2億元調低至4.8億元，每股仍賺41.5仙，PE只係2.6倍！重有，大行估計遠展每股資產淨值3.0元，股價大折讓64%。
郭兆誠