市場極度樂觀嘅情緒，短短幾個禮拜就變得陰霾密布，早前重話樓價會挑戰新高嘅言論，一下子銷聲匿迹，現時主流意見係樓價回落，問題係，跌幅有幾大。
中原股東王文彥，喺公司網頁撰文，話樓價調整無可避免，原因係過去兩個月，買賣成交大幅萎縮，每月都比對上個月減少兩三成，咁最後樓價有乜辦法唔跌呢？佢認為，基本因素根本支持唔到樓價狂升，升得愈高，自然跌得愈重。
佢話，好似鰂魚涌太古城，過去炒家入市掃貨，善價而沽，業主見狀又封盤，令供應銳減，出現缺盤。𠵱家炒家急於出貨，供應梗係大增，甚至不惜互相踐踏，樓價跌幅隨時可能出人意表。
王文彥指出，最近兩個月，租務比例持續上升，反映買家愈嚟愈抗拒現時嘅價格，除非樓價大跌，唔係都幾難叫啲買家去買樓。
講咗咁耐，王文彥提到對樓價嘅預測，佢估計，二手樓跌幅至少有一成到一成半，一手重弊，要跌一成半至兩成至夠。佢補充，中小型住宅，跌幅會比豪宅細啲。咁幾時至調整完，就要睇調整速度與外圍客觀因素而定。
雅典奧運會八月開幕，地產界都掀起運動熱，美聯噚日喺何文田君頤峰會所，搞咗場羽毛球友誼賽，新世界、美聯與傳媒隊，打雙打，結果傳媒隊先後擊敗美聯及新世界摘冠，亞軍係新世界。
以往友誼賽，傳媒隊輸多贏少，或者係和波收場。成日踎寫字樓，運動唔多嘅記者朋友，今趟威番次。不過，其實兩場比賽，都係先落後，再逐分逐分追番嚟，重打到最後幾分，先至分到勝負。
吐露港科學園，暫時只有美食廣場與咖啡店，所以科學園計劃將七千呎闢作中餐廳，委託縱橫商業顧問公司招標搵承辦商。下月初截標，之後兩周開標，預計九月初開業。
縱橫商業顧問董事總經理陳家齊話，餐廳走高檔，所以對承辦商要求嚴格啲。科學園展覽館，會開放畀公眾參觀，即係餐廳可以倚賴呢批客。餐廳除咗做午市同晚市，重可以做埋酒席。
陳家齊話，餐廳租期最少五年，若果想長啲，入標時可以提出，有商量。
恒基西灣河大型住宅，至今冇聲氣開賣，但係佢哋做晒準備工夫，重租咗隔籬鯉景灣商場蘇豪東千呎地舖，不過暫時封晒紅紙，未知究竟搞邊科、幾時揭盅，係咁納空租。
蘭西同鯉景灣商場業主、嘉華地產助理總經理（物業）陳玉成講開，佢話，恒基係行家，租期冇乜所謂，好有彈性；不過，一講到租金，陳玉成就即刻好嚴肅咁話，照番市值，呎租近百。
樓市逆轉，當初發展商都舉出大把理由，話樓價可以企穩，甚至可以再升，但係南豐上個禮拜率先劈價，之後發展商開始變得口硬手軟，重施變相減價故技，目的當然係想搶番啲客啦！
市場人士正在玩緊競猜遊戲，估吓下一個減價發展商係邊間、邊個盤、減幅有幾多。發展商試完高位後，睇怕都要一段時間至可以尋底，買家可以有時間慢慢揀心水單位。
蘭西
電郵地址：
