好友大報復，恒指一升就係397點，升幅3.6%。國企指數重勁，升253點，升幅6.9%。升幅超過100%嘅窩輪，竟然有15隻。升幅少過50%嘅，都唔能夠打入50大。記憶中，從來未試過有咁厲害嘅紀錄。
Call輪升咗咁多，入市都幾蝦人，保守啲嘅做法，係等有回吐之時先至考慮。買Put輪，又驚個市真係見底，𠵱家做嘢，最好限住注碼。
長實（001）升3元，收54.50元，升幅細過恒地（012）同新世界（017）。Call輪9227收39仙，彈升34%，隻輪11月到期，溢價13.6%，槓桿率14倍。9389收48仙，升得9.1%。揀Call輪炒，9389比較值得諗諗，隻輪又係11月夠鐘，溢價11.3%，槓桿率11.4倍。9227急升之後，9389有機會追番上去。
新地（016）升3元，收60.75元，升幅細過其他3件大地產股。吼新地Call輪，9391係主角，12月到期，輪價53仙，溢價13.8%，槓桿率11.5倍，昨日彈升39%，可以等回落些少至買入。
中移動（941）升95仙，收20.85元，重建升軌，Call輪吼9979，11月到期，輪價19.7仙，溢價10.2%，槓桿率10.6倍。
想細細粒，刀仔鋸樹仔，諗招商局Call輪9264，8月到期，輪價6.4仙，溢價7.3%，槓桿率14.8倍。紅籌國企一家親，招商局（144）昨日升6.8%，估計重有得去，帶埋9264上去。
章盛