港股噚日反彈，國企指數更反彈逾3%。淡友似乎不急於搶攻，採以靜制動策略，將沽盤拉高幾格引好友追貨，可惜買盤動力一般，恒指只升104點，報11072，成交123.7億元。
阿虎見到美林在110元掛出大量滙控（005）沽盤，兼在2.90元力壓中海油（883），唯高達更在11.75元排大隊等沽中銀香港（2388），望落去有啲似以前官鱷大戰咁款（但唯高調轉槍頭做沽家）。
Cookie話，以上反映基金仍持續減磅，但博反彈的投資者愈來愈少，如果突然傳出不利消息，相信芬佬唔會好似噚日咁惜貨，將狠狠地沽貨。現時銀行體系結餘仍有逾300億元，相信芬佬重有大把貨要沽。
市場傳出，電盈（008）不單會同聯通（762）合作搞本地流動電話市場，重話電盈會出售固網業務。電盈噚日收4.90元，升0.5%，表面上好似冇乜變動，但似乎有衍生工具商入市收集，睇嚟空穴來風未必無因。
兗煤（1171）早前被外資洗倉，跌至最低價5.30元，其中一個原因是國內會削減煤炭運輸優惠。兗煤管理層噚日同投資界見過面，講解有關影響唔係咁大，投資者好似定番啲，股價勁升13%，收6元。
新地（016）快將推出珀麗灣三期，近期樓市開始調整，市場正在觀望新地會否重施故技，以超低價搶客兼清貨。新地的售樓策略頗能反映其對後市的看法。
新地沽空交易噚日大減，空軍又轉移陣地至和黃（013），沽空金額逾1億元。
阿虎