經紀陳果然冇講錯，中富控股（1191）屬亂炒一通，噚日隻股高開低收，倒跌13.3%，收3.9仙。睇嚟二三線股真係有排未成氣候。
至於天地數碼（500）獲摩托羅拉入股一事，終於落實，並傳出今日會復牌。如果在市旺之時，隻股相信必炒無疑，但在今時今日，小初就唔係咁睇好。隻股舊年由1元左右起步，最高見過2.70元，停牌前收2.15。聽講幕後人並唔係散到太多貨。
不過，經紀陳就話覺得天地數碼炒上嘅機會大過炒落。原因好簡單，首先係天地數碼貨源夠晒疏，幾乎邊個人揸幾多都數得出。其次，摩托羅拉入股的認購價，係按復牌後30日平均價計數，雖然講明唔會高過每股1元，即係較停牌收市價2.15元點都折讓五成有多，但斷估公司方面，都唔想股價太低，令公司發行太多新股。
經紀陳講完一大輪，小初仍然有多少疑慮，橫掂家陣唔少藍薵股勁平，選擇又多，使乜炒二三線股咁大風險。
慕容小初