大市因超賣而反彈，恒指與期指重見萬一。恒指成份股最醒目嘅係中海油（883），由2.675元彈上2.90元，升幅8.4%。恒指升104點，有30點來自中海油貢獻。
10大窩輪龍虎榜，有4件係中海油Call輪，升幅由39%至136%，帶頭嘅係9032，下月中到期，輪價8.5仙，溢價1.6%，槓桿率17.1倍，隻輪溢價低，槓桿率高，未來3個幾禮拜仍會跟貼正股，波幅唔會細。同類輪9255收20.6仙，升44%，7月底到期，溢價3.0%，槓桿率7倍。呢件數據亦都唔錯。
買中海油Call輪，要考慮嘅係正股升得速，恐怕再升水位有限。不如諗吓，中海油升後，其他石油股會跟住有運行，吼吓其他油股Call輪。
中石油（857）與中石化（386）大多數Call輪溢價高得滯，中石油Call輪9901比較實際，8月到期，輪價69仙，溢價只係2.1%，槓桿率4.8倍，呢件每日有幾球轉手，買賣唔太難。中石化Call輪9909更加抵買，7月初到期，輪價35仙，負溢價2.8%，槓桿率7.1倍，弊在交投極疏，好多時全日只有幾十萬份易手，昨日更全無交投。
中銀（2388）近期跌得急，昨日回升10仙，可望再彈多些少，搵中銀Call輪短炒，對象有9168與9169。9169喺明年2月先至夠鐘，輪價8仙，溢價12.7%，槓桿率14.6倍，細細粒，贏輸好快見功。
章盛