美國女歌手BritneySpears出道時原本係乖乖女，但今時今日已經變成喪妹一名。雖然好多時下嘅年輕人仍然視Britney為偶像，不過Britney一啲都唔檢點一吓自己嘅行為，最近佢多次着住印有粗口字樣嘅衫褲出嚟見人，有個師奶路見不平，重鬧到Britney狗血淋頭㖭！
話說Britney近日喺洛杉磯一咖啡店買嘢飲嗰陣，着咗一件背脊印有粗口「FxxkYou」字樣嘅T恤。點知排佢後面嘅師奶見到就扯火，重即時捉住Britney嚟鬧。個師奶當時對住Britney話：「我真係以你為恥，你知唔知你應該係時下年輕人嘅榜樣？你件衫好有侮辱性，連你個人都係！」之後Britney尷尬到即時走人，連杯嘢飲都唔記得攞㖭。
其實我羅拉好明白，𠵱家好多歌手為咗博出位，就會着啲標新立異嘅衣着，好似RobbieWilliams、AvrilLavigne、KellyOsbourne等，都先後着過粗口衫。不過Britney繼早前同舞蹈員喺台上表演近乎三級嘅舞步加埋佢個自殺MV，紀錄咁差，又難怪俾人鬧得咁厲害嘅！