相信好多影迷都睇過一啲講述災難嘅電影，題材通常離唔開撞船、地震、暴雨同大風雪，英國影迷最近就搞咗個選舉，選出咗史上最佳災難電影，結果由真赫曼（GeneHackman）主演嘅七二年電影《海神號遇險記》得第一位，而近年嘅《鐵達尼號》同講摩天大廈火災嘅《沖天大火災》就排喺第二同第三位。
其他較近期嘅入圍電影有《天煞——地球反擊戰》同《龍捲風暴》，分別位列第六同第十。不過UCI院線搞呢個選舉都係想話畀大家知，下星期就有一部將所有災難元素共冶一爐嘅《明日之後》上映。
呢套《明日之後》製作費高達一億二千五百萬美元（約九億七千五百萬港元），故事係講溫室效應令全球氣溫上升，世界各地天氣反常，地球再面臨另一次冰河時期嘅來臨，各地都出現颶風、暴雨同龍捲風等天災，由丹尼斯奎爾（DennisQuaid）飾演嘅氣候學家就要設法拯救地球。
據講呢部《明日之後》嘅出現，令批評喬治布殊環保政策不足嘅聲音更大，估唔到𠵱家嘅災難電影，除咗用特技效果嚟製造娛樂性之餘，重可以令人關注更多政治同埋環保嘅嘢，的確係莫大嘅進步。