立法會政制事務小組開會，李柱銘發言，善意勸告中方，唔好派咁多京官落嚟，郁吓就誹謗香港有人搞港獨，呢一樣唔係事實。
媽田所講嘅，就係最近嘅「朱育誠砌生豬肉事件」。朱育誠啱啱落來，明明話過佢只係來「聽意見」，估唔到一個月未夠就即時不止畀意見，重破口大罵，變咗「朱義誠」。嘻哈三人組第二號人物林瑞麟，一聽見「京官」兩字，即時發火，話媽田咁講，係對「中央嘅同事好嚴重嘅指控」。
林公公平時俾議員炮轟，長期都木無表情。但今次一聽見「京官」受靶，即時開眼彈起，挺身護駕，呢啲小腿條件反射嘅動作好真，呃唔到人，證明林公公緊張京官，多過緊張自己條命，呢亭人，胡溫唔吸收佢加入中國共產黨，任佢荒廢喺特區，平時只叫佢DHL吓啲文件上北京，真係好浪費人才。
不過史提芬．Lam一時口快，佢呢句說話，國家未必啱聽。點解？因為佢將堂堂朱育誠，界定為「中央嘅同事」。「同事」？真係笑話。朱育某係來自北京嘅欽差，亦係我國最高領導人曾副主席嘅私人代表，中央係林公公嘅阿頂，朱育誠唔係林公公嘅同事，而係向林公公話事。正如喺滙豐銀行，掃地阿嬸陳四珠女士，敢唔敢稱呼主席為「我嘅同事」？林公公屋企嗰位菲傭瑪莉亞，星期日傍住林太出街去中環買嘢，敢唔敢向坐喺文華酒店門口嘅菲傭，介紹林太話，佢係我sister。
喺我國社會，講上尊下卑，貴賤一向有個秩序，若然林公公講嘢時冇大冇細，咁我哋中央嘅胡主席，都可以講係維園阿伯嘅「同事」，維園阿伯都唔夠膽，林公公反而咁講平等，可見佢讀得鬼佬書太多，洗腦未洗清！
民協馮檢基，亦因開口「警告中央」昅着脷，遭到土共暴力恐嚇。人大釋法雖然佢深圳闖關成功，同麥國風、黃成智等三人，得蒙中央領導人李飛親自垂召，並賞賜蛋撻一件、餅乾兩塊大白兔奶糖數粒、清茶一杯，但本地土共人士唔肯原諒佢大罵佢有乜資格「警告中央」，連中央都敢警告，簡直侮辱，曾憲梓話頭，真係食咗老虎膽！
雖然，天文台都時時警告市民，明日將會有冷鋒，記住要着多兩件衫，不過幾十年來，只有人民政府中央警告人，從來冇蟻民敢「警告」中央（雖然人民政府嗰啲「警告」幾十年來，都冇乜人理，例如警告台灣人唔好選阿扁，警告美國唔好軍售台灣，全世界一早睇穿晒），不過馮檢基以一介蟻民身份，警告中共，居然生勾勾冇事，都咪話唔令人跌眼鏡。
不過，恐嚇馮檢基嘅嗰啲維園阿伯，又係罵錯咗人，馮檢基曾蒙祖國賞賜嘅茶點，佢應該上次去深圳，李飛指示佢食蛋撻，佢食完半隻，忍住飢餓，留番半隻，叫李飛喺上面啲酥皮簽個名，帶落嚟香港，放喺議員辦事處，用個玻璃櫃封實，擺喺門口，一有土共阿伯上門想掟狗屎、潑紅漆，見到副嘢，就會遠遠避開，好似吸血殭屍見到十字架咁靈，阿基上次見李飛，可能心情太激動，食茶點狼吞虎嚥，食到渣都冇剩，真係唔夠高瞻遠矚喎。
傳真︰2623-9278
電郵︰