信和集團近排不單主力賣將軍澳蔚藍灣畔，連內地樓都唔敢怠慢，佢哋嘅廈門雅麗閣，上個禮拜六首度開賣，兩日沽出四十三伙，佔整個項目九成，銷售速度唔比香港樓弱。
呢個樓盤喺廈門屬中檔住宅，外形似集團嘅元朗帝庭居，所以有廈門版帝庭居之稱。分層單位五九七至一四八九呎，複式一五二五至二○五九呎，每呎三百五至四百三，售價普遍係四十幾萬至七十萬。
賣樓主帥營業部總經理韓家輝話，由於個盤喺湖里區海天路，屬幾旺區份，唔少外地資金投資當地舖位，好似雅麗閣八個地舖，部份就由新加坡同埋台灣投資者買入，最貴一間要成三百幾萬。
成日同南區豪宅樓價相提並論嘅鴨脷洲深灣軒，屋宇署資料顯示，原來建築成本每呎八百五十蚊重有找。
呢次新鴻基地產同政府真係賺到笑。何解？因為新地○○年時以七億三千九百九十萬投到呢幅地，地價每呎都只係一千一百幾，就算利息同其他雜費幾咁揦脷，畀到盡，每呎去到八百蚊好未？
計落總成本都大約二千八百蚊，但𠵱家平均都要賣成五千五百蚊呎，最高更超過七千銀，賣晒成千個，套現超過三十五億，差唔多賺成一個開，政府應該大約可以分到四億嚟滅赤。
人有相似，所以不時會認錯人，特別係生得似明星嘅。世紀21馬鞍山頌安邨分行許秋偉，有幾次帶客睇樓，都俾人誤會係藝人謝天華。佢加入七年，最近升主管，少咗帶客睇樓。
講開升職，利嘉閣董事伍洽強話，大角嘴維港灣分行嘅王永基，剛連升兩級，由客戶經理升為分行經理，掌管長沙灣昇悅居分行B組。至於喺將軍澳區多年，一年做到過百萬數嘅黃展望，喺做完一輪港島豪宅代理後，最近重返將軍澳區，由高級客戶經理，晉身為經理，負責南豐廣場分行。
今年以嚟，唔少業主見市旺，標售物業，但最近氣氛逆轉，入標都去唔到價，有啲賣唔出。好似西環干諾道西118號十七樓，本月六號截標，收到兩份標書，唔到價收番。
中原何紹榮話，業主有意改為分拆出售；十七樓一三二六五呎，現分九個單位，有買家洽購其中四個，共五千六呎，出價每呎千六到千八，業主正考慮中。業主保留三個海景單位收租。
全層賣唔出就間細賣，業主都幾識靈活走位。
噚日一連兩宗名人賣樓。設計師高文安，以五百五萬沽出飛鵝山豪宅陶樂苑六座連天台，一三六八呎，每呎逾四千，蝕咗五百三萬。
高文安自從幫長實樓盤做裝修設計，聲名大噪，𠵱家身處內地，有大把項目做，認真唔得閒。
另外胡關李羅律師行創辦人之一關卓然，八百八萬沽出大坑道嘉苑一三七○呎高層，每呎六千四。
賭王何鴻燊四太梁安琪，傳向新世界預留深水灣香島道三十三號獨立屋，值逾億四。
蘭西
電郵地址：
