上周六本欄題目為《港股傷盡好友心》，以皇馬關鍵3仗全輸，失去爭奪冠軍希望令擁躉傷心，來比喻上周港股最後3個關鍵交易日下跌，牛市將結束而令好友傷心。誰知還有下文，皇馬前晚出戰降班魚腩梅西亞竟然敗陣，變成真正的西班牙魚腩，最邪係港股昨日再大跌309點，收10967，連萬一關亦失守，好友何止傷心，簡直是心碎。
趙飛雲自己安慰自己，皇馬重有一場波就踢完今季賽事，即係港股最多跌埋下個禮拜一就不用再跌。
以上純屬穿鑿附會，讀者笑完就算，不必認真，但皇馬擁躉及港股好友就真係好傷，特別係二而為一那一批。
昨日中外的壞消息特別多，外圍美股期指大跌百多點，近期如驚弓之鳥的亞洲股市自然反應大，港股相對於其他亞洲股市，其實不算跌得特別多。現時基金食胡，資金不斷流出香港股市，股份供過於求自然下跌，而羊群效應再引致恐慌性拋售，一向是跌市的三部曲。股市何時止跌就要睇大戶基金幾時覺得抵買，重新再入市。
正如昨日所講，散戶只有坐順風車的份兒，目前只有等市況出現轉勢的訊號。
對於優質的大藍籌，其實可採分段吸納的方法。如果你相信去年4月是地產股最黑暗的時刻，而恒地（012）現價29.25元，不妨每跌2元買2000股，去年4月恒地低位為18.05元，即買齊1萬股，恒地要跌至19元左右，正好隨時見底反彈。另方面，跌穿低位則需全部止蝕。以上只是一個舉例，大家可按心水選擇。
趙飛雲