「隔五分鐘先嚟閃我一嘢」
秋生怨Edison搶風頭

陳冠希（Edison）的友人涉嫌與人爭執打鬥而被帶返警署後，令Edison頓成新聞人物，前晚他在銅鑼灣拍戲時，就有大班記者前來採訪。同場的黃秋生不滿風頭被搶，他後來更笑着埋怨：「隔五分鐘先嚟閃我一嘢。」

陳冠希前晚與黃秋生和李心潔在銅鑼灣拍攝電影《頭條新聞》的宣傳片，前日凌晨Edison的友人涉嫌與人衝突而打架，有指當時Edison亦在場，故前晚引來大班記者追訪他。秋生和心潔被迫到一角，後來導演陳嘉上向記者表示，秋生對被忽略感到不滿。秋生得悉陳嘉上踢爆他有微言後，就向陳嘉上說：「我同你咁講，唔使同番記者咁講吖嘛。」

與心潔談情：筍呀
及後秋生被問到是否介意被搶風頭，他笑着說：「梗係介意啦，明星梗係想多人影好啲啦，你睇𠵱家幾稀疏！啲人走晒（大部份記者跟着陳冠希離去），隔五分鐘先嚟閃我一嘢。」問秋生拍攝得順不順利？他說：「梗係順利，你哋嚟到嘭嘭聲快咗幾多，本來一點幾先完，𠵱家十二點幾就轉得景。」秋生在片中與心潔有感情戲，他說：「筍呀，梗係好啦，又靚仔又靚女咁，我講緊個靚仔係我呀。」
問秋生與Edison合作有何感覺？他說：「佢聰明又聽話，係唔識中文囉，人哋講乜佢唔知，佢講乜人哋又唔知。」他又說：「平時導演講解劇情，講完大家就嗱嗱臨拍啦，呢個後生仔重要消化，重問嘅，咁都好，都幫到我㗎。」

「我唔知發生乜事」
Edison拍攝完畢返家休息，秋生和李燦森等分別到了Edison的寓所，至昨日凌晨二時許，眾人再到柴灣繼續拍攝。Edison對於友人涉嫌與人爭執一事，竟否認道：「係好多人打電話畀我，我都唔知發生乜事，我嗰晚喺IFC個party後同朋友飲嘢，因為有幾個日本朋友嚟咗，根本冇發生過任何事，唔係蘭桂坊發生乜都關我陳冠希事呀？」Edison又謂從沒去過杜汶澤有份開設的酒吧。
採訪：陳梅香
攝影：陳偉權、娛樂突發組