自助燒碟、買雜誌送電腦工具光碟，年終裏頭，大家都唔知儲埋幾多有碟冇盒嘅光碟，後果當然擺放雜亂，搵起上嚟又麻煩啦！
日本IMATION最近新出了一個DiscStakka嘅光碟收納系統；佢一次最多可以收藏100隻CD或DVD，最方便之處係佢跟機有一套《Opditracker》軟件，只要透過USB1.1/2.0接線同電腦作聯繫，每次一入碟落去DiscStakka，佢就會自動將光碟名稱及種類記錄下來，方便大家在電腦內作查閱及整理，如果攞起手要用到，只要電腦內一Click，指定的碟片會在幾秒內迅速彈出，極之方便。
現時日本方面已經正式推出市場，網上評論都話幾方便，網友重發現連PlayStation2一類遊戲光碟都對應到，真係幾強，不過唯一不滿是既然讀到碟片Title，點解唔做埋CD-ROM功能，可以在DiscStakka直讀，要用家吓吓Click出嚟，放入電腦光碟機再讀咁麻煩呢！DiscStakka現時機價18,600日圓，約算港幣$1,300，價位都算可接受，唔知香港電腦產品水貨商會唔會入貨呢？
記者：朱崇德