中國超級聯賽第一輪賽事完成，六場聯賽除大連實德爆大冷主場輸畀遼寧中譽外，球證執法水準極具爭議性，成為賽後焦點。
上個禮拜有睇「收費台」免費直播申花對魯能波友，會對球證補時階段判山東魯能球員禁區內犯規，畀申花一個十二碼判決有唔同睇法，應唔應該吹罰，見仁見智；最弊係判決時間又真係好尷尬，離開補時夠鐘都唔夠三十秒，難怪山東魯能賽後要上訴。
其實，負責執法北京國安對四川冠城球證同樣備受爭議，因為有北京球員隋東亮一次飛鏟搞到四川後衞劉玉建斷腳，但球證居然只畀黃牌！我求大俠擔心中超聯咁樣執法水準、尺度同以往甲A無異，波友今個星期睇免費直播時肯定有機會見到火爆場面。
前車路士名宿蘇拿可能重返史丹福橋，不過唔係踢紀念賽，而係執教鞭！據英國報章報道，車仔嘅油王班主阿巴莫域治向蘇拿招手，想佢成為球隊下屆嘅教練團團員之一。不過，我求大俠覺得蘇拿睇到同鄉領隊雲尼亞里今屆點俾阿巴莫域治同行政總監簡安耍，未必會應承。
英超聯盟主阿仙奴喺日前勝利巡遊後，領隊雲格首次開腔話法國前鋒韋托特會自由身離隊。雖然韋托特喺○○年加盟「兵工廠」時要成一千一百萬鎊（約一億五千四百萬港元），破咗阿仙奴當時球會紀錄，不過會方唔留佢，雲格早放風話佢會走，唔阻佢發達，都係好事。
講開阿仙奴，佢哋認真巴閉，除咗男子隊全季聯賽不敗封王之外，原來女子隊重威，除咗四年來第三次奪得女子英超聯冠軍之外，重連足總盃同埋聯賽盃都贏埋，成為「三冠后」，下屆代表英格蘭踢女子歐洲足協盃。唔怪得連阿仙奴領隊雲格都講笑話要向女子隊偷師㖭！
帕爾馬喺意甲四哥之爭輸畀國米，不過前日射手基拿甸奴就着晒火，對烏甸尼斯「大四喜」。好彩同日AC無收起舒夫真高，等佢入到波，啱啱以一球（二十四球）壓倒前者，否則要同人分神射手殊榮。眼見基拿甸奴弗到震，養傷嘅恩沙基肯定怕國家隊個位會俾另一「基」仔搶走。