李柱銘開立法會玩手提電話？重要玩有影相功能嘅電話？原來噚日立法會政制事務委員會開會，討論到選舉問題時，提到有選民投訴俾內地幹部「勸喻」投票畀「愛國愛港」人士，重可能要以相機電話影低做證據。
政府猛話已有法例禁止投票時拍照，媽田即場攞出手提，向住坐喺佢前面嘅政制事務局局長林瑞麟，話用手提影相話咁易，「嘟、嘟、嘟」㩒三吓已經影咗相，冇人覺。
八方知道媽田唔多熟新科技，呢個電話應該係佢個仔Joey幫佢買同教佢用，今次媽田卒之有機會喺大家面前威一次。但點都唔及林D9威猛，默許京官朱育誠抹黑港人搞港獨，噚日媽田鬧朱育誠，好似踩親林瑞麟條尾，林局長馬上彈起力挺朱，同人唔同命，香港人唔恨得咁多。當然林D9公開承認立法會冇一個議員搞港獨，算係講番句公道話。
傳真︰2623-9278
電郵︰