加息、宏調與油價高企本已困擾港股，噚日再加上兩岸局勢緊張，伊拉克臨時領袖被炸死，美股場外期指大跌，瑞銀減持亞洲股市，資金持續流出，金管局又要出動入市接港元，種種不利因素令港股失守11000，收報10967，大跌309點，成交161億元。
最誇張係一向抗跌力最強的公用股亦大跌，中電（002）及港燈（006）分別跌4.1%及4.4%，家陣唔通冇油冇煤發電？芬佬沽起貨上嚟真係狠。阿虎唔知基金減磅行動幾時至完，有芬佬估計可能要到銀行體系結餘跌至少於100億元才完成。
早前空軍集結的中銀香港（2388），噚日急挫6.8%至11.6元，成交金額激增至9.21億元。據聞先前以每股13.70元接咗貨嘅基金大戶要止蝕。不過，空軍似乎在11.50元水平開始平淡倉食胡，轉移至新地（016）集結，新地單日急挫5.3%至57.75元，成交金額高達7億元，其中有1.47億元是沽空，看來後市仍有排跌。
電視廣播（511）被一波及花旗狂質，股價勁挫12%，有傳聞話廣東落地權單deal傾唔掂。早前有消息話，電視廣播正洽商與廣東省南方廣播集團成立合營公司，若落實合營協議，電視廣播擁有的落地權範圍及條件將遠較亞洲電視為佳。但電視廣播當時股價企於37元水平，一直冇異動，照計傾唔掂都唔使撻到咁應。
港股早前調整，偉易達（303）一直企硬於13-14元水平，但噚日好似出現崩潰，股價勁挫23%至10.10元，成交1130萬元，似乎維持秩序的炒家都要做逃兵。
阿虎