大市噚日又大跌，二三線股跌幅更勁。經紀黃話，芬佬全面撤退，導致大量優質工業股好似被斬倉咁款，偉易達（303）跌23%，晶門科技（2878）大插21%，已經去到聞者傷心，見者流淚的境況。
經紀黃話，如果芬佬本身贖回情況繼續嚴重，就算隻股基本因素點好都冇用，皆因家陣大市由資金流向主導，小投資者暫時都係手持現金穩陣，待日後大市回穩再上車都未遲。
噚日股價仍上升的股票，部份屬冇厘頭一類，好似江湖傳聞中富控股（1191）主席私人持有的中富航空，獲小超人青睞入股，明明成件事唔關上市公司事，但中富股價竟然夾硬抽上，最高見過5.1仙，收4.5仙，升幅達21.6%，但成交股數只得1763萬股，金額81.78萬元，就知道唔成氣候。
中富舊年確係諗過收購中富航空，但因為技術問題導致計劃終止。事隔咁耐，如果能夠成功舊事重提，或者對中富帶來真正利益都未定，但家陣好明顯係亂炒一通。
慕容小初