八方以為煲呔喺香港俾政改爭拗搞到頭擰擰，出訪瑞典同俄羅斯會心情輕鬆啲，只談經濟，不講政治，點知佢老哥都係忍唔住，噚日喺一個介紹香港嘅午餐會上提到「文革」兩個字，真係勇不可當，證明當奴未完全變晒，只係人在江湖，身不由己啫。
事緣煲呔好開心獲俄國邀請去訪問，身為第一個訪俄政務司司長，煲呔梗係有好多嘢想推介，佢由香港歷史講起，話香港呢個城市叻在好似一個人一樣，每次跌倒之後回彈得更高，例如香港經歷過多次移民潮以及文化大革命期間嘅暴動等。嘩，文革喺大陸都未有官方版，煲呔亂咁指點中國內政，有冇問准朱育誠同徐澤呢？
勁敵當前，突圍而出，煲呔唔會漏咗推銷自己，提起九八年佢做財司嗰陣點打退炒家大鱷，仍然津津樂道。煲呔賣花讚花香，大讚港人韌力強、活力勁、創造力豐富、有專業精神，香港地理位置又好，喺正中國南大門，至於佢自己壇政改就一字不提。不過，去到史太林祖家，大家心照啦，唔通俄人會問你喺中共之下，有冇民主自由咁笨咩。
（圖）曾蔭權到莫斯科訪問，與俄羅斯工會會長普里馬科夫會面，勁sell香港。
政府新聞處圖片
傳真︰2623-9278
電郵︰