最近股市動盪，外滙兌美元大跌，好多人坐晒艇。最近新城財經台搞投資講座，近千人出席，問問題之時，幾乎所有有關外滙嘅問題都係與澳元有關，可見香港人投資外滙存款，鍾意高息貨幣，以澳元為優先，最近澳元以及紐紙、英鎊等等大跌，相信有唔少人蒙受帳面損失，怕消費冇乜心機喎。
外滙K就㗎㗎笑，因為佢最怕滙市唔郁，郁親佢就發財。外滙K話：「我啲客如果買咗單邊，唔郁嘅話，我邊有佣金賺呀？滙市波幅大，客仔就驚，止賺止蝕、摸頂撈底，兼而有之，我就有行當啦！」不過香港客好精靈，經驗豐富，唔會同外滙K賭身家，總係會將資產分散於存款、股票、外滙，近來買啲零售債券㖭。
外滙K覺得本地客戶咬唔入，走上珠三角搵客，得到有力人士介紹，拉咗幾個金鑛，發覺香港已經係雞肋，內地人先至係肥雞髀，點解呢？原來內地客有兩個好處：（一）錢多；（二）好鍾意炒，每日唔炒一轉唔安樂。外滙K見到個市郁得厲害，想留住啲好客（能產生多多佣金的客仔就是好客）慢慢歎，有時勸啲客忍手，啲客都聽唔入耳，係要入市。
啲客有幾肥呢？每月畀佣金竟然高達六位數字（highsixfigures），簡直羨慕死人！唔怪得最近聽到一啲投資公司已考慮到內地舉行投資講座，推銷外滙買賣，如果成功嘅話，淨係珠三角都有排做，唔使學習普通話！