周街都話鄭大班同黃毓民香港兩支咪封咗之後，𠵱家特區只剩番一報一刊，都係由黎智英做老細，最近成功醫好驚恐症、發力上位嘅港台高官曾智華，呢頭搵定梁振英馬力開咪，𠱁到土共高興咗一輪，點知嗰頭又養唔熟竟然約緊黎生做訪問，真係祝佢好運。
講開曾智華，佢噚日專誠打電話畀八方，多謝抬舉，話佢係下任廣播處處長嘅黑馬人選，搞到佢猛收恭喜電話，八方重以為朱培慶個位咁惹火，冇乜人想做，點知都有好多人吼實。
曾智華苦笑咁話，自己點會做到處長吖，如果佢之前同田少以及馬力拍檔做節目，訪問唐唐、吳光正、曾鈺成以及陳啟宗得分，咁最近佢應該失分，因為楊森訪問李柱銘同朱牧師，而余若薇就打算訪問華叔同湯家驊，當然之後佢搵梁振英出場，中方轉嗔為喜，又補番唔少飛。曾智華話自己最多可叫做左右逢源，未至成為處長黑馬。不過今次辣埋肥佬黎度，欺騙老左感情，只有曾智華夠膽。
傳真︰2623-9278
電郵︰