自從方逸華入主無綫後，無綫各部門都閂水喉，慳得就慳，早排先減薪裁員，請梁思浩食豉椒炒魷，而無綫繼《都市閒情》後，《勁歌金曲》亦喺個幾月之前無端端取消咗現場觀眾，搞到啲歌手錄影時冇晒氣氛好冇癮。
馮仁昭聽聞取消現埸觀眾原來係為咗慳錢，事關每次請觀眾嚟要租幾部城巴接載佢哋，又要搵紀念品，重要加派保安同工作人員照顧現場觀眾，開支每次都要成二萬蚊，所謂小數怕長計，無綫喺閂水喉大前提下，啲節目咪盡量減少請現場觀眾嚟囉，認真縮骨！
另外，李克勤前晚喺無綫將軍澳電視廣播城出席《勁歌金曲》錄影，佢話近日忙於同譚詠麟去內地做巡迴演唱會，每月大約做兩至三場，最近啱啱去湛江演出，由於贊助商係壯陽補酒商，所以大會重請佢兩個飲壯陽酒。飲嘅時候克勤同阿倫都你推我讓，阿倫話：「我二十五歲重得，唔使呢啲嘢。」而克勤就話：「唔使太早飲，我自己有實力，重可以靠自己。」認真搞笑。
利嘉兒早排去咗加拿大拍攝旅遊特輯，佢參觀過一間全世界最細嘅教堂，旁邊重有一個好靚嘅湖，佢話：「去完呢個地方之後，我開始對結婚有憧憬。」問佢有冇考慮過同周國豐步入教堂，點知利嘉兒就話：「最後同邊個結婚都未知，我哋一齊冇幾耐，未咁快，但係大家對呢份感情係認真嘅。」
馮仁昭聽聞萬綺雯（萬二蚊）早幾日喺北京拍亞視劇集《我和殭屍有個約會3永恆國度》一場吊威吔戲嘅時候，發生意外跌傷腰骨，情況都幾嚴重。但噚日亞視就話萬二蚊其實只係扭親冇大礙，而佢已經返香港睇咗醫生，馮仁昭本來想慰問吓萬二蚊，但call極佢都冇覆，唔通佢嘅傷勢好嚴重？
劉德華日前接受商台訪問，講起今年九月就會開演唱會，檔期就喺正歌神許冠傑（阿Sam）之後，華仔重話要叫阿Sam幫手，買五十張劉德華嘅演唱會飛就換一張阿Sam嘅演唱會飛。華仔重話自己未試過舉行一個覺得精采嘅演唱會，所以今年佢想搞一個好中國化嘅演唱會，重話唔只變臉咁簡單，懶神秘咁。
許志安噚日出席喺商台舉行嘅「品味．生活調教室」活動，安仔重即場調酒同埋整甜品Tiramisu，不過整Tiramisu嘅時候，安仔就顯得雞手鴨腳，但佢自己就話都幾鍾意煮嘢食，之前佢同鄭秀文嘅廚房宣言咁深入民心，問佢𠵱家重有冇喺廚房同人傾心事，安仔就話：「唔講呢啲嘢，都係舊聞啦，我𠵱家入廚房淨係攞嘢飲。」
