港股呢兩個半月跌勢認真急，所謂主要支持位，基本上都唔見有乜支持，穿吓一關又一關，恒指現時距離萬一點只相差約280點，守唔守得穩仍要睇過先知。
不過，候低位博反彈仍大有人在，恒指Call輪始終有市場，但大部份恒指Call輪都跌唔足，其實相當難玩，現時數據較合理有9914，隻輪10月28日才到期，重有5個月命，行使價11400，叫做相當貼價，溢價6.9%，槓桿率17倍，只要大市唔係繼續彈小小之後大大散，9914博得過。當然，恒指跌到落萬一點，9914數據亦會出現變化，到時買唔買得過要重新睇過。
上周五跌市主角係國企，國企指數大插4.7%，中企Put輪盡領風騷，其中較多人玩嘅9369大升33%，收0.191元。呢隻Put輪6月29日到期，行使價4000，溢價7%，槓桿率7.3倍，數據雖然唔算太理想，但算係中企Put輪中可以接受嘅一隻。
有留意9369走勢嘅讀者，應該知道呢隻輪嘅特性係快上快落兼波幅大，買賣周時追到氣咳，同時尾市經常出現收水（隻輪只有個多月命，但溢價仍高達7%，所以難避免）。
一般散戶多數唔係咁鍾意玩Put輪，但如果認為短期國企指數未跌完，9369可以一諗，但就要留意隻輪走勢嘅特性。
章盛